城中鏡：李國儀細說兩蚊住六國
香港最老牌嘅兩間酒店，分別係半島同六國，一間八十五歲，另一間八十歲。六國為咗慶祝八十大壽，尋日開Party，唔少長情客人都過嚟飲番杯，酒店總經理李國儀滿場飛，佢話當年租房兩蚊雞，靚房都係十幾蚊，但唔好忘記，當年嘅打工仔月薪只有兩、三蚊咋，所以住得起六國酒店，真係身份象徵嚟o架，李國儀仲話酒店有八、九成客人都係熟客，最長情已經住咗二十幾年！
李國儀話酒店有八、九成客人都係熟客，最長情已經住咗二十幾年添！
早喺一九三一年陸海通創辦人陳任國同陳符祥，以二十幾萬買入六國酒店現址，酒店喺一九三三年十月六日正式開幕，拎到三個第一。酒店樓高七層，當年唔單止係港島區最高嘅建築物，亦係第一間設有中菜廳嘅酒店，兼且係灣仔區第一幢有升降機嘅建築物！屹立八十年，六國酒店經歷過好多風風雨雨，所以海陸通主席陳伯奇喺大會就話，多謝客人一路以嚟嘅支持。
