中文大學踏入金禧紀念,前日舉行咗一場音樂籌款晚會,事先已張揚會請來八位殿堂級歌唱家大獻歌喉「吸水」,截至上月底已籌得逾千萬元。當晚商務及經濟發展局前局長「肥亨」馬時亨都在場,原來佢上月獲中大委任為中大工商管理學院教授,加埋香港大學同理工大學,佢已經係本港三間大學嘅教授。佢成晚笑笑口,皆因佢細女馬露玲幾日後就出嫁,但佢話早前坐完郵輪歐遊後肥咗五磅,要積極瘦身至着得落「踢死兔」!

莊偉茵(左)同老公黃楚權拍拖出席音樂籌款晚會。

黃宜弘(右)捐錢力撐太太梁鳳儀(左)。

因為細女露玲快出嫁,馬時亨成晚都笑笑口。

莊偉茵同老公拍拖睇騷

身為校友嘅中華電力企業發展總裁莊偉茵同老公黃楚權拍拖到場,佢話鍾意聽徐小鳳唱歌,老公就愛聽粵曲,前晚嘅表演滿足晒要求喎。當晚會場中央起咗個圓形舞台,十足演唱會格局,中大校長沈祖堯喺台上一邊致詞一邊三百六十度自轉,佢話好唔慣,唔知有冇頭暈呢?

作為籌委會主席嘅和聲書院院監會主席梁鳳儀當晚好搶鏡,着住粉紅色拖尾吊帶裙出場,佢老公、立法會前議員「IQ博士」黃宜弘就揸住杯紅酒滿場飛招待賓客,十足擺酒請飲咁款。IQ博士為撐老婆,豪捐二百萬元畀和聲書院。

第一手消息請下載on.cc東方互動iPhone/iPad/Android/Windows Phone Apps