政壇：政府搞地方論壇增交流
特首CY梁振英曾經講過，話「地區問題，地區解決」，仲話要加強同地區嘅溝通，即係話佢好重視地方行政，咁十八個區議會嘅角色當然唔可以忽視。
政府尋日公布，將於本月底至下月初舉行四場地方行政高峰會，分四個專題探討如何改善地方行政，提升區議會同民政事務專員角色。首場專題論壇喺今個月二十八日舉行，主題為地區活力及關愛同地區文化體育，另外三場將於下月一日、四日同十一日舉行，分別討論城市規劃同公營房屋發展、環境衞生同街道管理、以及大廈管理和維修。
呢幾場專題論壇都會有相關政策局嘅局長、常任秘書長同部門首長出席，然後再由十八區區議會正、副主席，喺下月二十一日向CY匯報討論成果同進行交流。
