上海自貿區喺上月底掛牌,一直捍衞上海利益嘅上海金融服務辦公室主任方星海亦都喺呢個時間功成身退!上海市政府網站公布,已經免去咗方星海喺上海市金融服務辦公室嘅職務,通告日期係上個月二十三號,但就未有公布佢嘅去向同埋新職位安排。

方星海卸任上海金融服務辦公室主任職務,但去向未明。

方星海一向敢言,香港小股民以至財金官員對佢一啲都唔會陌生,佢每次出場都好惹火,仲最着重捍衞上海嘅利益。好多年前,佢話上海目標係同紐約、倫敦比較,仲話香港建人民幣離岸中心係「一個草率嘅主意」。

上海市政府嘅公告無交代方星海嘅去向,但坊間早就盛傳佢會上調中央,去中央財經領導小組任職,之前亦有傳聞話佢會出任中證監主任肖鋼嘅助理。

第一手消息請下載on.cc東方互動iPhone/iPad/Android/Windows Phone Apps