政壇：馬唯中任M+水墨策展人
台灣第一千金Lesley馬唯中婚後定居香港，雖然唔憂柴米，但係鍾意藝術嘅佢，又點會甘心賦閒做全職主婦？西九文化管理局消息證實，Lesley獲西九旗下視覺文化博物館（M+）錄取，兼職負責水墨藝術策展人，尋日正式喺博物館嘅尖沙咀寫字樓返工。
馬唯中唔單止定居香港，仲發展埋事業添。（資料圖片）
據講，Lesley係透過公開招聘，自己搵上門，佢嘅正式頭銜係「策展人（水墨）」，工作範疇包括建立水墨藏品、研究同策展工作，例如搞展覽、研討會等。M+現有幾位策展人，分別負責設計、建築等唔同藝術範疇，有啲係專職，有啲就好似Lesley咁做兼職。
Lesley打呢份工可謂游刃有餘，事關佢係紐約大學博物館系碩士，曾經喺美國加入知名華人爆破藝術專家蔡國強工作室，做項目經理兼發言人。今年三月，佢閃嫁畀金融才俊蔡沛然，兩人定居香港。期間Lesley不時被影到出席藝術活動。唔知佢揀做兼職工作，係咪想以家庭為重，以便隨時造人呢？
