政壇：鐵頭仁攞着數民望勁跌
立法會今日正式「開學」，班議員除咗要準時開會，仲要留意吓民望，皆因過咗一個悠長暑假，唔少議員民望好似瀡滑梯咁急瀉，個個都「滿江紅」。港大民意研究計劃尋日公布十大立法會議員評分，對比七月休會前，所有議員評分都下跌，其中跌得最多、傷得最重就係白鴿黨「鐵頭仁」何俊仁，估計係爆出佢接受國泰航空款待豪遊法國「收機團」，涉嫌利益衝突有關。
設計圖片及對白
長毛排尾二
港大民研由九月二十七日至十月三日，以電話訪問五百至六百多名市民，鐵頭仁跌咗六點一分，評分仲跌至佢自○六年首次上榜以來嘅新低，睇嚟接受法國豪遊款待對佢影響都好大，就算佢道歉、回水都掹唔番，民望好似雪球咁滾落山。至於「長毛」梁國雄都唔好得去邊，跌咗五點四分排尾二。
調查又發現，「逆水行舟、不進則退」呢個道理原來講唔通，因為新民黨葉劉淑儀評分無起跌，已經係咁多個議員當中最好嘅一位，仲繼續排第二位添。立法會主席曾鈺成就第三次蟬聯榜首，但都跌咗一點九分，唔知同佢最近發表嘅「心魔論」有冇關呢？
民研又總結一年嚟議員嘅排名，佢哋除咗要高分之外，仲要有番咁上下認知度。最終有十四名議員上到榜，排第一都係曾鈺成，而長毛雖然低分，但認知度搭夠，所以排第五，反而工聯會陳婉嫻平均分數拍得住曾主席，但就唔夠認知度，只排到第十。不過，十四名議員全部都係直選或超級區議會議員，傳統功能界別嘅議員就真係要諗吓計，睇吓點樣急起直追喇！
