幼園學額唔夠數 教育高官唔得掂

連日來，全港多區持續爆發排隊潮，唔少幼稚園門口打晒蛇餅，大批家長露宿街頭，為仔女輪候入學報名表格。上水幼稚園嘅場面最誇張，家長鬥早瞓街，派表前一個禮拜已經「全副武裝」，有人帶齊帳篷、被鋪，準備打持久戰，「攞唔到表就唔走」。有家長仲帶埋幼童捱通宵，話為咗仔女入讀心儀學校，再辛苦都值得喎。

唉，可憐天下父母心。家長餐風露宿，捱更抵夜，無非緊張仔女前途啫。老實講，有頭髮冇人想做瘌痢，如果唔係擔心幼稚園學額不足，又點會出現咁多亂象吖。

最離譜就係，港產官僚仲擘大眼講大話，教育局局長吳克儉大派定心丸，聲稱全港有廿四萬個幼稚園學額，足夠應付，家長唔使擔心喎。事實係咪咁呢？當然唔係喇。

呢，本報以全港幼稚園學額總數廿四萬推算，估計K1學額只有約八萬個，而前年出生嘅嬰兒就創下近年高峰九萬五千多人，如果當中嘅三萬五千多名適齡雙非兒童全數湧港就學，下學年全港幼稚園K1學額將短缺一萬五千個。你話嘞，學額夠唔夠應付吖？高官係咪講大話吖？吳克儉連呢啲最基本嘅數字都矇查查，唔怪得畀人稱為「唔得掂」喇！

尤其係鄰近邊境嘅重災區包括北區、元朗及屯門，幼稚園學額更加爭崩頭。三區K1學額加加埋埋只有一萬二千幾個，就算一半適齡雙非兒童明年來港就讀，都差一大截喇。咁搞法，家長有乜辦法唔緊張，唔徬徨，唔瞓街吖。

講到雙非問題，咪又係前朝曾蔭權爵士嘅好帶挈囉。貪曾任內對內地孕婦來者不拒，導致雙非問題尾大不掉，一時逼爆醫院，一時逼爆小學，依家又輪到幼稚園，亂象無日無之。近年兩地居民衝突不斷，矛盾愈演愈烈，根本就係貪曾埋下嘅禍根。現屆政府接過爛攤子，話就話要撥亂反正，點知又係志大才疏，明知跨境學童大軍隨時殺到，依然漫不經心，見步行步，既冇統籌，連最基本嘅收生程序都唔好好協調，搞到幼稚園派表七國咁亂，家長怨聲載道，吳克儉身為主管教育嘅問責官員，又該當何罪？

嗱，有本地家長今日發起遊行，誓保本地學童優先取得學位，港府再唔諗辦法拆掂佢，隨時又搞出個大頭佛嘅咋，叮！