所謂「港生寶寶」，顧名思義就係在香港出生的寶寶，理論上所有香港BB都屬於「港生寶寶」，但係好明顯大陸代辦排隊攞幼稚園入學申請表格所提到嘅「港生寶寶」，係指父母都唔係香港居民嘅雙非兒童。

上年係龍年，香港出生率例牌創新高。每逢龍年，個個都諗住生番個龍B，希望個仔或女係龍的傳人，查實都唔知為乜？點解一啲毫無根據嘅神話吹水故事，可以咁樣一代傳一代？屬龍嘅細路人數特別多，到咗今年嗰班二○一二年龍B，好多都就快歲幾兩歲，係時候搵幼稚園。最近睇新聞，見到上水粉嶺有幾間幼稚園出現通宵排隊攞入學申請表嘅情況，當中有好多都係雙非兒童嘅家長，令到中港矛盾再一次浮面。有啲大陸網站甚至有代客排隊嘅服務。仲稱呼雙非兒童做「港生寶寶」，呢個北區爭學位問題勢必成為繼奶粉供應之後，又一困擾港人父母嘅中港衝突。

有啲「港生寶寶」嘅家長接受傳媒訪問時表示，如果早知面試係要用廣東話，佢哋就唔會嚟排隊攞表格。大佬，呢度係香港，廣東話係法定語言之一，係香港人嘅母語，作為「港生寶寶」，梗係要識廣東話，連呢啲基本概念都搞唔清嘅「陸生老母」或「陸生老竇」，唔該唔好諗住有件「港生寶寶」就可以落地生根。不過最搞笑都係教育局局長吳克儉，竟然話冇出現好多排隊情況，咁電視新聞映出嚟嗰啲係乜？

「港生寶寶」所帶來嘅學位問題只係冰山一角，未來勢必會帶來更多包括社會福利、住屋、醫療等更多矛盾，唔係一朝一夕可以解決。不過，其實香港有一個「港生寶寶」可能會有啲意見，佢就係真名叫「港生」嘅BB，唔知佢又會有啲咩偉論發表呢？

第一手消息請下載on.cc東方互動iPhone/iPad/Android/Windows Phone Apps