SUN搞作：少膽虫手記：人間辭話番外篇
千蚊早餐仲未歎完，肥豪就維持住興奮嘅狀態，連跑帶跳咁仆到少膽虫面前！撞啱初一，都係發虫威開齋嘅時候喇！點知少膽虫仲未「媽叉」得切，肥豪就開口：「隔籬油才子拉隊劈炮，改變嘅浪潮已經湧到嚟喇！我哋不如抄橋拍住上吖？」肥豪臉上橫肉起伏，似笑非笑，自問觀人於微嘅少膽虫，實在深感狐疑，惟有叫佢繼續發表高見。
「自從boss你前日買咗個柿返嚟，我就明白宣淫販賤，委實荼毒生靈……」少膽虫裝作沉思，「所以，我哋要學習廉恥！」聽到呢句，少膽虫不禁問：「咁應該點做呢？」但見肥豪義憤填膺，逐字吐出：「以．正．義．傳．媒．為．榜．樣！」
少膽虫谷出眼淚，指着腦細房門道：「肥豪，我支持你犯顏直諫！」肥豪聽了，連跑帶跳，「嘭」一聲衝入淫黎間房。一分鐘後，房內傳出一陣哀嚎，望出窗外，肥豪像隻無力的傻熊，在堆填區緩緩落下，少膽虫不禁冷笑。少年，你太年輕了，搞革命，不要找像狼一樣的隊友啊！
