政壇：搞搞政：楊華勇備戰 幼園撲位潮
北區幼稚園爆撲位潮，大批家長連日通宵達旦咁排隊，搞到城中好多父母都萬分緊張。囡囡只得八個月嘅楊華勇（Johnny）就話，已周圍收風，研究定心水幼稚園，太太莊菲娜（Fiona）亦開始湊囡囡返Playgroup，希望提早為入學幼稚園做準備。
設計圖片及對白
Johnny尋日出席一個活動，講到幼稚園排隊攞表，即刻廿四孝老竇上身咁，話如果囡囡升幼稚園時都要排隊，佢都在所不惜喎。
事實係佢同太太依家已經開始搵心水幼稚園，而且仲有年幾時間，唔愁搵唔到好學校喇。
出席同一活動嘅保良局總理陳正欣話，早幾年教育局因收生不足提出「殺校」政策，好彩佢哋預見幾年後有大批跨境學童湧港，決定縮班應對，如果唔係依家就頭痛喇！佢仲預期，呢股排隊攞表潮將來好可能會蔓延至小學都未定。
