政壇：王庭聰豪宅贈女做嫁妝

大埔臨海低密度豪宅新盤前日開售，一位擁有中港車牌嘅神秘人「王先生」豪擲一千六百萬元購入逾千呎豪宅盤送畀愛女做嫁妝。呢位神秘人原來係從事紡織生意嘅港區全國人大代表王庭聰，王庭聰愛女王麗霞（Crystal）快將同拍拖五年嘅金融才俊拉埋天窗，住喺大埔十多年嘅王庭聰話，原本諗住女兒都住喺佢屋企附近，但佢睇中咗呢個新樓盤，加上只係距離十分鐘車程，所以就為女兒購入結婚居所。