政壇：吳永嘉試食炒蜆似Kiss
葵涌運動場尋日有個食品嘉年華活動，中華廠商聯合會會長施榮懷同廠商會展覽服務有限公司主席吳永嘉喺場內大展廚藝，佢哋唔止喺會務上合拍，連合作煮兩味都好有默契。
施榮懷（右）同吳永嘉（左）合作煮餸，又互餵食物搞氣氛。
佢哋示範炮製豉椒炒蜆、薑葱魚腩煲，期間仲「煙韌」互相餵對方試食物，吳永嘉試食時，好似同隻蜆Kiss咁，吮到雙眼半開半合，引來台下觀眾一陣爆笑聲。施榮懷就自爆佢老婆連煲飯都唔識，點知太太即刻反駁話：「你唔係同我結咗婚二十年，到依家至知嘛？」兩夫妻妙談廚藝引人發笑，邊個話現代女性一定要識煮飯呢？
