放完悠長暑假嘅立法會開始新一立法年度嘅準備工作，秘書處前日公布十八個事務委員會新一年度嘅委員名單，從議員加入委員會數目嚟睇，最勤力嘅係「長毛」梁國雄，一個人報名加入咗十一個委員會，不過長毛嘅往績顯示佢好可能只係扮勤力，事關佢出晒名開會成日遲到早退，又唔睇文件備課，好多時求其現身掟吓嘢、掃吓枱，鬧完兩句之後，就立即轉身走人，前後開會唔夠十分鐘。至於鄉議局主席劉皇發（發叔），就只係加入咗兩個委員會。

有多名議員都加入咗七至八個事務委員會，建築、測量及都市規劃界謝偉銓就報咗九個，喺功能界別議員中算係少見。至於被人叫做「大懶蟲」多年嘅發叔，今年就變本加厲，只係加入咗政制同發展兩個事務委員會，比去年再減少一個。內會主席梁君彥、飲食界張宇人、衞生服務界李國麟及工聯會黃國健，亦各自加入咗三個事務委員會，數目同去年一樣。

政改議題受關注，毫無意外嘅係政制事務委員會今年有成四十二人、即過半數議員加入。緊隨其後嘅發展事務委員會亦有三十三人加入，包括多名新界東議員，估計係為新界東北發展計劃而來。至於最少人加入嘅就係工商事務委員會，只有十四名委員，似乎大部分議員對香港嘅工商業發展漠不關心，難怪香港競爭力近年每況愈下喇！

第一手消息請下載on.cc東方互動iPhone/iPad/Android/Windows Phone Apps