政壇：蔣麗芸老公充當「柴可夫」
政界近排籠罩自駕魔咒，平時有司機接送嘅議員忽然揸車就容易出事，立法會議員林健鋒已係人辦。建仔嘅議員蔣麗芸（Ann）尋日出席個活動，咁啱佢嘅司機亦放假，但阿Ann就唔敢揸車，搵咗丈夫梁海明做「柴可夫司機」。
蔣麗芸（左）尋日搵丈夫梁海明（右）充當司機，仲要丈夫呆等兩個鐘。
阿Ann尋日為一個關於兒童權利嘅活動做嘉賓，老公揸車接送，點知個活動好耐都未完，本來低調坐喺觀眾席嘅梁海明可能悶到頂唔順，去咗逛商場，但行咗幾圈個活動都未完，佢惟有喺商場頂層挨住圍欄俯視阿Ann。有臨時司機服務嘅阿Ann話，做咗議員之後就唔敢揸車，因為多嘢諗咗，揸車時又可能要回覆電話，所以都係請司機穩陣啲好。不過，佢個司機唔易做，好似尋日咁，阿Ann出席完商場活動後仲要去長沙灣視察發生火警嘅劏房，結果老公又要跟住深入火災現場，到夜晚兩夫婦先可以拍吓拖睇演唱會。
