政壇：高永文成世誤打誤撞
應屆政府中，食物及衞生局局長高永文人氣一直不俗，尋日高醫生出席香港醫學專科學院二十周年開放日活動，並擔任演講嘉賓，佢講到從醫經過時自言，成世人都誤打誤撞，首先係盲舂舂咁做咗醫科生，之後做埋專科醫生、入咗醫管局，甚至到入官場做局長。咁容易？唔怪得有與會導師講笑話，曾有想讀醫科嘅學生透露，因為想做局長先讀醫o架！咁咪即係想做第二個高永文？結果呢句說話引得全場大笑，但高永文就鬼咁尷尬。
設計圖片及對白
高永文喺演講中表示，自己其實一向都好驚考試，會考嗰年已覺得參加會考好痛苦喇，以為讀完高中就舒服晒，點知考完高考，就要考入大學讀醫科，跟住又有大學畢業試！之後終於做咗醫生，點知醫生仲有大把試要考，譬如專科醫生試、英國皇家醫學院嘅考試等。
直到入醫管局做管理層，又要學習管理知識，參與相關碩士學位課程考試，所以佢認為人生好似爬山咁，考試停不了。
受病人尊重 好滿足
雖然係咁，高醫生由從醫甚至入官場嘅經過，都畀人好輕鬆、坐定定等收穫嘅感覺，因為佢從冇讀醫科嘅念頭，到做咗醫科生甚至專科醫生，之後仲做埋最高民望嘅局長，比好多苦心安排嘅人仲順利。不過，高醫生都話，其實佢從醫都遇過唔順利嘅事，曾經被投訴，但佢明白總會有病人對醫生專業服務有意見，呢啲係病人嘅權益，而從醫學良知角度嚟睇，醫者始終要以病人利益為依歸喎。雖然有機會被投訴，但做醫生嘅滿足感，以及受到病人尊重嘅感覺係良好嘅。
