魔鬼交易欲蓋彌彰 假公濟私無法無天
人證加物證，唔到你唔認。前特首曾蔭權爵士乞求私見教宗嘅「魔鬼交易」曝光之後，港產官僚一直詐傻扮懵，裝聾扮啞，直至日前，律政司終於發新聞稿交代事件，變相證實魔鬼交易確實存在。但可惜吖，港產官僚唔知係咪同貪曾有魔鬼交易，話就話交代事件，點知吞吞吐吐，閃閃縮縮，唔止無法令公眾釋疑，反而仲留低更多疑團添。
律政司係咁講嘅，時任香港駐歐盟特派代表栢志高○七年向當時嘅律政司署理國際法律專員陸少冰尋求指示，指意大利參議員Gregorio曾同佢接觸，查詢意大利當局向港府索取前總理貝魯斯干尼案資料嘅「執行情況」。即係話，栢志高魔鬼交易中間人嘅角色已獲得證實，但奇怪嘅係，新聞稿居然聲稱時任律政司司長黃仁龍唔知情喎，你信唔信吖？
叮，信佢一成，雙目失明！全世界都聽到該名意大利參議員嘅供詞點講，佢實牙實齒話栢志高向佢表示，已經向黃仁龍轉達阻撓移交資料嘅要求。唔通佢講大話？意大利參議員唔係港產政客，同港府高官無怨無仇，斷估唔會生安白造老屈香港律政司司長啫。正如有立法會議員話齋，事件涉及極為敏感嘅政治、外交及司法獨立問題，黃仁龍無理由唔知情，港產官僚官官相衞唔出奇，都唔好侮辱市民智慧吖！
講到侮辱市民智慧，仲有吖。係人都知，貪曾係呢單魔鬼交易嘅始作俑者，如果唔係佢貪慕虛榮，假公濟私，根本唔會搞出呢場風波，點知律政司新聞稿居然隻字不提佢喺事件中嘅角色，好似完全唔關佢事咁，擺明就係無私顯見私啦。好心港產官僚咪咁天真，貪曾涉嫌干預司法，水洗唔清，你哋愈係想醜事密冚，愈係自暴其醜嘅咋。
即係咁，有魔鬼，先至有魔鬼交易。貪曾人格卑劣，除咗貪腐，仲要涉嫌干預司法，究竟邊個係魔鬼，相信大家自有答案。嗱，人在做，天在看，如果畀咁嘅貪官逍遙法外，唔止天冇眼，香港更加冇運行。所以咯喎，有立法會議員要求特首梁振英責成貪曾、黃仁龍及栢志高三人公開交代事件，太一叮絕對贊成o架。正如老毛話齋，掃帚不到，灰塵照例不會自己跑掉。魔鬼交易性質嚴重，影響惡劣，如果有人唔肯合作，立法會不妨動用特權法呢把「尚方寶劍」徹查，一定要窮追猛打，追到水落石出吖，叮！
