SUN搞作：少膽虫手記：啞視是朋友
壹如以往，少膽虫踎喺廁塔玩手機撞糖果，編輯肥豪突然打嚟大叫：「腦腫！不得了喇！快啲返嚟！」少膽虫無奈沖廁，點知一拉，完全無水出。「乾爭爭，無晒水出？」轉過身想拎廁紙，又發現得番半格，連洗手盆都無水。
「搞乜呀？」少膽虫一路抹手指，一路趕番office，見到肥豪，佢即刻話：「啞視抽乾我哋水呀！」少膽虫愕然，心諗大家都係全霉，又係乾晒塘，相煎何太急呢？肥豪拎咗份日月邪報出嚟，指住單新聞：「你自己睇喇！」
「啞視建成抽水管駁通各大全霉……」少膽虫睇完好不安，一手拍喺肥豪膊頭猛咁捽：「做得好！多謝你報料！」然後就衝入去腦細房領功。
「腦細！原來我哋乾晒塘唔係因為報紙燒量跌，而係畀啞視抽乾水呀！」少膽虫面上一熱，正中一巴。「啞視都識講啦，日月邪報夠預言梁特辭職啦，你信呀？」淫賤黎氣定神閒：「再講，啞視遲出糧根本唔係新聞，日月邪報識鬼做新聞咩！」少膽虫只好唯唯諾諾，又聽見淫賤黎訓示：「無咗啞視呢個剝削員工嘅好朋友，我哋咁樣蹂躪嗰個狂舞美國妹，實畀人針對啦！」
