SUN奇古怪：【暗交】
潮語「暗交」近年幾乎日日喺報章娛樂版出現，話邊個明星姐仔「暗交」邊個有錢有婦之夫，又話邊個男星「暗交」邊個大陸索模。「暗交」其實係「暗中交往」嘅縮寫，係一種唔見得光嘅交往，而交往嘅深入程度就無特定。近呢幾年香港文字媒體，好鍾意用「暗交」呢類大陸縮寫，咁樣係非常符合香港將一切事情簡單化嘅大趨勢。「暗交」又唔局限喺偷情上，有時工作上都可能需要「暗交」，例如最近英美外交官員對香港民主發展發表意見，香港左派人士又會懷疑泛民主派「暗交」外國勢力，干預香港內政。又例如特首出席公眾論壇，有大批地區勢力人士出現，有人就懷疑特首「暗交」社團人士，到底係真交定真心膠，就留待大家自行推斷……
雖然話明人不做暗事，但係啲名人就專係好鍾意做暗事。不過又難怪，正所謂人怕出名豬怕肥，好多名人雖然名成利就，出到街有人識，食飯隨時唔使等位，碟餸都好味啲，禁區上落車CUT雙白線阿Sir都可能畀番幾分薄面唔抄牌……但係唔好嘅方面就係因為多人識，所以好多嘢都唔做得。例如名人就唔可以隨便拖住二廠偷食打車輪，又唔可以當街講粗口撩鼻屎，行為舉止都要檢點過人，雖則呢啲嘢普通人都唔可以肆無忌憚咁做，但係名人斷正又真係會衰多幾錢重。話雖如此，名人始終係人，都有七情六慾，有時不小心背着另一半同人撻着，就只能夠「暗交」。
其實「暗交」又唔一定係明星政要嘅專利，普通人都可以玩，好似外國有個偷情網站，專門幫啲偷食男女配對，規模愈做愈大，聽講個搞手仲因而賺大錢！呢股「暗交」風氣最近仲吹到嚟香港。不過大家交還交，萬事都係小心啲好，如果唔係一不小心「暗交」變「暗膠」咁就真係 「膠」！
