立法會十八個事務委員會同財務委員會轄下嘅兩個小組委員會下周四開會選正、副主席，雖然泛民同建制派事前已經協調，但泛民喺資訊科技及廣播事務委員會將再度內鬥，事關黃毓民同資訊科技界議員莫乃光同樣有意問鼎主席。

舊年莫乃光雖然得到泛民支持，但毓民就因為建制派「過票」而成功出任主席。事隔一年，毓民同莫乃光都有意捲土重來，為咗令建制派知道自己係泛民認可嘅候選人，莫乃光除向代表建制派協調嘅議員表明意向外，仲廣發短訊爭取委員支持。

據講建制派向泛民表明，若然出現多過一位泛民候選人，委員就有權自由投票。誰勝誰負，要視乎建制派嘅投票意向喇！

另外，內務委員會同財務委員會尋日分別選出正、副主席，內會主席繼續由梁君彥出任；而金融界吳亮星就以四十票擊敗得二十三票嘅劉慧卿出任財會主席，劉慧卿就連任副主席一職。吳亮星話會確保議員有足夠發言時間同機會，但就認為拉布時間愈短愈好。

第一手消息請下載on.cc東方互動iPhone/iPad/Android/Windows Phone Apps