政壇：羅啟妍設計林鄭「愛戴」
前日灣仔會展舉行年度古董珠寶展Fine Art Asia，邀請政務司司長林鄭月娥同著名華人珠寶設計師羅啟妍擔任主禮嘉賓，佢哋喺酒會碰面即熱情傾談，之後雙雙移步到展場內欣賞展品。林鄭行行吓見到羅啟妍設計嘅珠寶品牌展位，即主動行入去參觀，又不時同羅啟妍咬耳仔，莫非已睇中在場飾物？
許曉暉（左起）、羅啟妍、林鄭月娥及Fine Art Asia行政總裁盧卓楹畢竟都係愛靚嘅女士，齊齊研究扮靚心得。
羅啟妍話各國唔少政要都係佢嘅長期顧客，林鄭仲幫襯咗佢超過十年添，平均五次活動就有兩次戴住佢嘅珠寶作品喎。至於林鄭最愛乜嘢款式？有冇打折畀佢？羅啟妍就唔肯透露，但佢話林鄭擁有其中一款飾物係價值近萬元、由灰貝殼同珍珠製成嘅花形心口針，款式都幾大方o架！
點解羅啟妍嘅設計深受各國政要愛戴？佢解釋係因為款式夠穩陣，點襯都唔會出事喎！
