政壇：卿姐揼肥亨心口賀黨慶
尋晚係白鴿黨成立十九周年黨慶，唔少政商界人士都有畀面出席，包括任內同該黨主席劉慧卿關係唔錯嘅商務及經濟發展局前局長「肥亨」馬時亨，但身為主人家嘅卿姐就冇錫住對方，揶揄對方係「未來疑似特首」，搞到肥亨要急急澄清。卿姐玩完人之後又大揼肥亨心口，前後捐咗近五十萬元，學卿姐話齋：真係離晒譜呀！
卿姐形容肥亨係「未來疑似特首」，搞到肥亨要急急澄清。
老友肥亨一到會場，卿姐就一個箭步上前拉咗佢去主家席，仲指定要佢坐自己隔籬，大讚肥亨係未來疑似特首。肥亨就澄清從來都冇諗過做特首，係啲人想像力豐富咁話。到咗拍賣籌款環節，肥亨諗都唔諗就用咗八萬蚊，投得由前政務司司長唐英年捐出嘅一箱紅酒，之後佢再多次慷慨解囊，前後捐咗近五十萬元，證明佢無怪卿姐擺自己上枱。
