政壇：港鐵走精面請區議員豪遊昂坪
自從有行政會議成員同立法會議員被揭發接受國泰款待豪遊法國後，政界人心惶惶，議員無論接受乜利益都申報。但我哋收到消息，港鐵尋日款待一眾區議員乘搭昂坪360水晶纜車同到昂坪市集擦番餐，難道港鐵唔怕重蹈國泰款待議員嘅覆轍？非也，原來係港鐵走緊精面。
北區區議員葉曜丞、蘇西智及姚銘聯同一眾長者排隊登昂坪360水晶纜車返回東涌。
議員同居民登上水晶纜車後有講有笑。
話說早前港鐵邀請咗四個區議會乘搭水晶纜車暢遊昂坪，但睇真啲張邀請信，清楚列明議員只可攜同最多兩名區內長者參與。有地區人士估計，此舉就算擺明係款待議員，但因為同時款待區內長者同行，咁就無咁易招人話柄。加上有關邀請信無講明議員唔可以攜同本身長者家屬參加，所以議員可以大條道理帶埋自己父母或長者親屬去搭吓水晶纜車，兼擦番餐。
就尋日東涌纜車站所見，有三十多名區議員同近一百名長者齊集，我哋見到嘅議員除有北區區議會主席蘇西智外，仲有當區議員姚銘、大埔區議員羅舜泉、關永業等。有份出席今次活動嘅議員話，原來今次係港鐵區議會聯絡小組搞嘅活動，邀請北區、大埔、沙田同西貢區議會嘅議員參加。
佢哋先喺東涌聽職員介紹360纜車工程、技術及參觀纜車車房，之後再乘搭水晶纜車到昂坪，並於昂坪市集一間茶樓午膳，最後一行人再乘搭水晶纜車返回東涌，並由港鐵專車接載返屋企。關永業同羅舜泉就分別話，其實港鐵一向都有舉辦類似地區活動，例如今年中秋節就邀請議員同居民去參觀九龍灣車廠兼整月餅，去年聖誕節又有請議員同義工去港鐵公司整曲奇，而每次都註明議員只可帶義工同往。
港鐵回應查詢時話，佢哋一向同社區建立良好關係，而區議會又同社區有密切聯繫，所以不時會同區議會一齊搞活動，並邀請居民參加。
