政壇：張仁良呻啃豬頭骨
今年九月入主香港教育學院做校長嘅張仁良日前剛「滿月」，同多名一齊訪京嘅大學校長食紅雞蛋慶祝。佢依家住喺大埔郊區嘅教院校長宿舍，喺大自然寧靜懷抱下，每晚十點半鐘就同周公見面。
佢話教院遠離大埔巿中心，想食碗雲吞麵都難，相比之前住喺火炭，鄰近公路，夜間飛車聲嘈到無覺好瞓，依家惟有早啲抖，每朝六點半鐘起身耍太極，瞓得唔好就四點幾鐘起身喎！
屢任棘手公職
老實講，前校長張炳良當年搬入教院校長宿舍，都覺得嗰度好靜o架！舊年佢入咗政府熱廚房，做咗運輸及房屋局局長後，咪一樣喺大埔搵屋住，可見住住吓就習慣，睇嚟張仁良好快會適應。
話時話，點解咁寧靜都會瞓得唔好呢？張仁良除咗成日掛住為教院爭取「正名」做大學外，可能身為扶貧委員會成員，最近要四出介紹自己做主席嘅社會創新及創業發展基金，睇睇大家喺「衣、食、住、行」等方面有無創新思維扶貧同防貧。佢笑笑口話，政府搵佢都係做棘手嘅工作，呢個基金係新概念，向商界同業界解釋至少兩次。
張仁良又憶述，○六年佢做「伙伴倡自強」社區協作計劃諮詢委員會主席，當時無乜人知道乜嘢係「社會企業」，要花時間去宣傳同解釋，隨後緊接做西九文化區管理局諮詢會主席，都係好棘手。佢講到咁樣，莫非埋怨政府專係搵佢去做啲豬頭骨工作？
