私煙逃稅三十億 港府控煙枉自欺
「吸煙危害健康」，官老爺一直將呢句宣傳口號掛喺口邊，可惜講者自講，吸者自吸，尤其係私煙猖獗，危害庫房，佢哋一於少理。又難怪嘅，如果話畀人知私煙猖獗，逃稅嚴重喎，即係承認自己無能，執法不力，港產官僚梗係側側膊，唔多覺啦。
之但係咁，港產官僚唔講啫，唔代表問題唔存在o架。嗱，有組織調查發現，本港消耗嘅香煙之中，近三成六係私煙，等於每年十八億支，令港府每年損失三十三億元稅收。至於私煙氾濫嘅原因，一字咁「錢」，政府猛加煙草稅吖嘛，搞到本港同外地嘅煙價差距不斷擴大，犯罪組織咪有機可乘，紛紛投身呢種高利潤、低風險嘅另類貿易活動囉。
叮佢個鎯鎯，港府控煙控到一頭煙，你話係咪弄巧反拙吖？好明顯，呢項調查反映咗兩個事實。第一個事實係港府把關不嚴，執法不力。私煙生意蒸蒸日上貨如輪轉，唔使問阿桂，唔係港產官僚無能，就係港府不負責任啦，煙稅就識加，私煙就唔識掃蕩，搞到香港變成「私煙之城」。
至於第二個事實咯喎，就係當局嘅控煙政策自相矛盾，吹水唔抹嘴。大家有眼睇，當局猛加煙稅嘅堂皇藉口，話有助煙民脫離吸煙行列喎，結果香港煙民有冇減少咗唔知，但私煙大幅激增就係人都知，加煙稅受益嘅唔係市民嘅健康，而係私梟嘅荷包，唔知好笑定好嬲，咁嘅控煙政策有乜意義呢？正如調查話齋，港府少收嘅煙草稅款龐大，足以向全港近十六萬戶在職貧窮家庭每年發放二萬元補貼。即係話，如果港產官僚有辦法令私煙絕迹，咁就真係幫到市民嘞。
話時話，加煙稅弄巧反拙，一啲都唔出奇，事關港府控煙根本就係虛偽。一方面叫人戒煙，一方面唔捨得煙稅，你話係咪精神分裂吖？更好笑嘅係，唔捨得煙稅咪算囉，仲要整色整水，冇嗰樣整嗰樣，一時室內禁煙，一時連酒吧食肆都唔放過，都唔知究竟係想幫人戒煙定係擾民！
一句到尾，私煙逃稅三十億，港府控煙枉自欺。調查組織呼籲社會商討解決私煙問題，其實，港府掃蕩私煙廢成咁，點商討都唔會有結果o架啦，港府如果真係想控煙，不如索性唔准賣煙吖，笨！
