城中鏡：鄭詩韻公幹 視像親子
每年秋季，時裝界嘅盛事亦相繼舉行，城中唔少名人近日都飛咗過花都巴黎，因為當地正舉行巴黎時裝周，名媛鄭詩韻就係其中一個，佢今次飛過去既為公亦為私，為公當然係公幹，至於私人目的就梗係睇吓明春新款及潮流，留意下心水。
鄭詩韻喺巴黎參加時裝周活動，第一時間掌握潮流方向。
鄭詩韻話，今次赴花都，雖然只係短短幾日，但都心掛掛兩個仔，每日都要透過視像電話同佢哋聯絡，了解佢哋嘅情況。城中咁多雙職媽咪，似乎可以學吓佢，縱使分身不暇，都仍然可以透過視像電話親子。
已有兩個仔嘅鄭詩韻咁鍾意小朋友，有冇打算追個女呢？佢就話暫未有計劃。
