城中鏡：潘偉賢技癢 再鋸大餅
中華電力新任總裁潘偉賢（Paul）本周一履新，但佢返工首日就已經坐唔定，跳出辦公室，去咗中電嘅電力工程學院，同一班正接受培訓嘅見習工程師同學徒交流。唔講唔知，原來阿Paul於一九七四年入職中電時曾接受過俗稱「鋸大餅」嘅電纜切割訓練，當年仲試過連續鋸電纜鋸足一星期。
新上任嘅潘偉賢（左）喺年輕學徒面前示範「鋸大餅」，表現駕輕就熟。
阿Paul去到電力工程學院，探望一班正接受訓練嘅見習工程師同學徒，唔知係咪見到啲架生手痕，佢即場喺班90後學員面前示範「鋸大餅」，雖然要切斷直徑八十毫米嘅金屬電纜可以話幾吃力，但着住制服、頭戴安全帽嘅阿Paul依然表現淡定，駕輕就熟。表演完「鋸大餅」之後，佢仲話「鋸大餅」係電力行業嘅基本功，年輕學徒可以透過「鋸大餅」訓練意志喎。學識「鋸大餅」後可以做到總裁，班年輕人唔知點諗呢？
