城中鏡：富二代貧苦初體驗
香港貧富懸殊日趨嚴重，含住金鎖匙出世嘅富二代真係好難體會基層之苦，叙福樓集團執董黃傑龍（Simon）、廖創興家族後人廖偉芬（Jennifer）等早前參加《窮富翁大作戰》節目，親身體驗居住天台屋、每日只有五十元可用嘅貧民生活。開辦牛肉專賣店嘅Simon變身成小食店員工，當佢得悉有市民竟然因牛肉價高，成年未嘗過一口牛肉時，心酸得不禁掉下男兒淚。
黃傑龍（左）由食肆老闆變身做小食店員工，發現壟斷市場確實影響小市民生活。（受訪者提供）
廖偉芬日間於華麗嘅酒店執房，到晚上則要瞓天台屋。（受訪者提供）
伍經衡
擬日捐百飯盒扶貧
Simon話，佢以前一向都唔相信有市場壟斷呢回事，只覺得小商戶嘅消失係社會汰弱留強嘅必然局面，但今次嘅貧苦體驗令佢重新反思。由於大作戰後仲要提出改善基層生活嘅建議，所以Simon計劃於旗下位於天水圍及黃大仙嘅食肆，試行每天捐出一百個飯盒予基層家庭，以及鼓勵同行一齊推動代用券計劃，藉此幫助基層改善飲食質素。
至於創辦著名連鎖咖啡店嘅Jennifer，就喺節目中體驗兩極生活，日間佢要喺豪華酒店內執房，夜晚就住喺天台改建成嘅狹窄房間。Jennifer自爆話，佢自小已有皮膚敏感同哮喘，家人從來將屋企打理到好似診所咁乾淨，今次住天台屋，敏感又發作。
伍經衡跟車送貨
不過，Jennifer發現港人好有創意，可以將任何地方嘅空間改建成住所，嚟緊佢打算與建築師及設計師合作，將棄置家具改裝後送贈基層家庭。
今次有份參與體驗嘅仲有由投資銀行界女強人轉行做法國菜大廚嘅陳彥琳，以及藝人伍詠薇胞兄、「補習天王」伍經衡同女兒伍雅愉，伍經衡於節目中體驗跟車送貨及髮型屋洗頭工作。
