西貢區議會尋日召開特別會議,討論西貢區議員方國珊(哪吒)喺未經批准下多次喺區內進行非法籌款,質疑佢違反區議員操守指引。尋日嘅會議主題圍繞哪吒,但佢卻無出席會議,仲要喺開會前唔夠三粒鐘向區議會秘書處發送電郵話想請假,最後區議會喺未通過對佢嘅譴責動議之前,就先否決佢嘅請假要求,之後又通過對佢嘅譴責動議,一日兩宗打擊,哪吒真係有風火輪都冇用。

設計圖片及對白

哪吒喺請假電郵入面同時附上一份文件,指摘新民主同盟同樣有進行非法籌款,要求區議會一視同仁檢視兩個違規情況,又反駁范國威(Gary)賊喊捉賊。不甘受辱嘅Gary即時發聲明澄清該黨七一當日領有正式籌款牌照,又決定向哪吒發出律師信,要求佢向新同盟同范國威道歉,否則就會循民事途徑控告對方誹謗。

泛民主派同建制派喺會上罕有連成一線,齊齊鬧爆哪吒先後十幾次喺港鐵站外非法籌款,行為令附近居民備受困擾。最後區議會以二十四票贊成、一票反對,通過對哪吒嘅譴責動議,西貢區議會主席吳仕福會後話自己同哪吒相識多年,如今見到後輩愈行愈遠,感到非常痛心,又批評哪吒成日發表與事實不符嘅言論,對區議會其他同事唔公平。

第一手消息請下載on.cc東方互動iPhone/iPad/Android/Windows Phone Apps