政壇：郭炳聯勉勵新地義工隊
善事唔怕做，新鴻基地產嘅義工隊唔經唔覺成立咗十周年，除咗服務大增，義工隊都極速壯大，主席兼董事總經理郭炳聯日前嘉許傑出義工，仲代表公司感謝每一個義工，其中一名義工以接近三千七百小時服務時數奪得最高服務時數金獎，即平均每年抽出近三百七十小時投入義工活動，認真令人敬佩。
新地義工隊伍有二千多人，郭炳聯（前中）嘉許他們的愛心奉獻。
郭炳聯嘉獎基層義工時，都為管理層代言：「公司管理層都一直身體力行，一齊投入義務工作！」唔講唔知，新地義工隊十年來累積嘅服務時數突破五十萬小時，參與人數更由十年前最初幾百人增加至依家二千二百人，聽聞佢哋成立初時，先設立建家小組、扶老小組、青苗小組同傷健小組，至一○年增設陽光小組，以凝聚青少年義工嘅力量。
近年更重點協助受屋邨重建影響嘅長者，同家庭出現突變嘅人士，十年來跟唔同嘅志願團體合作舉辦超過六百個義工活動！郭炳聯嘉許：「每一位義工同事嘅付出，都代表公司實踐『以心建家』嘅理念﹗」
