政壇：朱鼎健年植萬樹還碳債
有過百年歷史嘅粉嶺高爾夫球場應否收回用作東北發展之用，早排引起社會熱議，唔少市民對呢個佔地達一百七十公頃嘅球場僅供富豪打波玩樂，反彈極大，坐擁多個高爾夫球場嘅觀瀾湖集團主席兼行政總裁朱鼎健（Ken）話，佢哋旗下高爾夫球場每年至少種一萬棵樹，包括價值不菲嘅花梨木、羅漢松等，至今已種咗十幾年。若果粉嶺高球場學吓佢，第日成個山頭都係名樹，開放畀市民去尋幽探秘，咁市民咪可以直接分享球場嘅增值成果囉！
朱鼎健
其實如果粉嶺球場「被消失」，阿Ken應該會偷笑，因為球友將被迫搵其他球場打波，臨近香港嘅深圳觀瀾湖自然係得益者。不過阿Ken大大聲話反對，事關佢接觸高球已逾二十年，未曾聽聞有邊個地區將成熟嘅綠化用地攞嚟起樓，舊區重建或填海起樓就聽得多。佢反問，紐約中央公園位於市中心，佔地又夠晒大，但係有冇人打公園嘅主意呢？
堅決反對破壞綠地之餘，佢本身亦十分關注綠化，為咗抵銷深圳觀瀾湖球場及周邊設施而製造嘅碳排放，每年追種數以萬計嘅樹木以進行「碳補償」（Carbon Offsetting）。既然要不停種樹，於是佢索性買貴價樹苗，每年至少種一萬棵名樹，一來當係長遠投資，一來可以綠化環境，球手打波時又多咗賞樹樂趣，一舉多得。花梨十年價格上升幾百倍，至於羅漢松一盆盆栽動輒幾千蚊，佢旗下球場咁多名木，又係一筆財富噃。
