暑假外遊，令人回味無窮，身兼行會及立法會議員嘅葉劉淑儀上個月自製三星期大假，約埋囡囡Cynthia坐郵輪暢遊地中海，期間，葉太不忘與支持者聯繫，喺社交網站上載多款遊蹤相。平時衣着相當講究嘅葉太玩得開心外，假期衣着亦令人大開眼界，佢卸下一身行政人員套裝之後，一於嚟個大解放，喺旅途中只見佢一陣以熱褲上陣，一係就半截單車褲，炎炎夏日真係夠晒清涼。

坐郵輪巧遇梁志堅

葉太話，以往喺香港都唔敢着短褲，所以趁離港空檔着番夠本，講到拜拜套裝，告別青春多時嘅葉太都話，當年佢赴美留學都會以短打出入校園，今次歐遊再着熱褲都有感覺自己後生咗！

另外，我哋早前頭版報道，話貪曾前特首曾蔭權爵士同李國寶、劉鑾鴻等「曾朋友」同搭郵輪「水晶尚寧號」遊地中海，原來葉太同Cynthia都喺同一隻郵輪上，不過，葉太就話無喺船上見過貪曾，反而撞到地產建設商會執委會主席梁志堅，二人仲就樓市「辣招」交流意見添！

第一手消息請下載on.cc東方互動iPhone/iPad/Android/Windows Phone Apps