政壇：傅振中黐沉默之聲「賣萌」
以前叫做「陳廣文」嘅愛港之聲前核心成員傅振中，自從同愛港之聲和平「分手」後就自組「保衛香港運動」，實行自己做大佬，但似乎冇乜聲氣。前日適逢假期，傅振中冇相約愛港之聲召集人高達斌等昔日戰友敍舊，反而走咗去同另一打正愛國愛黨旗號嘅沉默之聲成員打邊爐。
傅振中前日喺社交網站fb上載多張同沉默之聲成員飲啤酒、打邊爐嘅相，相中嘅傅振中相當興奮，周圍撩人合照之餘，仲同沉默之聲總幹事陳健燊晒Ｖ「賣萌」，可唔可愛就見仁見智，只見二人面都紅晒，盡現酒意。既然傅振中同沉默之聲咁老友鬼鬼，點解唔索性合組壯大「愛字頭」實力呢？
陳健燊笑言已經成日叫傅振中入會o架喇，但形容傅振中成個浪子咁，係單刀直入嘅行動派，鍾意毫無束縛咁想做就去做，但沉默之聲始終講制度，有咩行動都要經投票通過先做得，唔啱傅振中性格。
