政壇：石禮謙喊減辣民調唔撐
本港樓價高企，港府祭出雙辣招後，炒風雖然收斂咗，但樓價依然未回軟，不過，地產界已經怨聲載道，幾次舉行大型活動反對。立法會方面，地產及建造界議員石禮謙都提出咗「減辣」修訂建議，今日相關嘅委員會仲會開會添。不過，中文大學亞太研究所尋日就發表一項民調，結果係近九成受訪市民認為現時樓價水平仍然過高，六成二受訪者希望維持現行辣招，一成四更要求「加辣」，一於同石禮謙唱反調。
石禮謙在立會提出減辣修訂，但中大的最新民調結果卻與他的倡議唱反調。（資料圖片）
亞太研究所上月底用電話成功訪問八百二十一名市民，問到有建議豁免港人公司及慈善團體受部分辣招影響，呢個亦係石禮謙提修訂嘅主要內容，調查結果顯示，有五成二受訪市民明言唔支持豁免港人公司，四成二受訪者唔支持豁免慈善團體。換言之，支持減辣嘅市民並唔多。咁一般消費者認為辣招能否壓抑樓市呢？約五成受訪者認為辣招對打擊樓價「有很大效果」及「效果頗大」，但亦有四成二認為「效果很小」或「完全沒有效果」。
立法會討論減辣修訂時，呢個民調結果估計有一定指標作用，石禮謙要點樣拆招呢？
