政壇：自駕魔咒籠罩政界
駕駛究竟係多樂趣定係多風險？照政圈近期嘅情況嚟睇，似乎屬後者多啲！高危一族就係嗰啲平時由司機接送、司機放假嗰日自己親自上陣揸車一族，繼發展局局長陳茂波、行會成員林健鋒之後，最新人辦係立法會主席曾鈺成，佢前日揸車出席一個電台活動時，就揸住架車剷中人哋嘅大鐵閘，左邊車門刮花咗，事後曾主席輕鬆話冇大礙，可以唔使整添！相較前面兩個因為自駕捲入官非者，曾主席真係要還神囉。
設計圖片
司機放假親自上陣
自從陳茂波自駕炒車要送院治理，行政會議成員林健鋒亦因為自駕時逆線行車，甚至被控不小心駕駛，又或面對更嚴厲指控之後，政界就被傳籠罩住「自駕魔咒」，話口未完曾鈺成就應驗。平時由司機接送嘅曾鈺成，前日因為司機放假，但曾鈺成又要入港台錄影節目，結果自行揸車，但唔知係太心急，定係少揸車之故，泊車時竟然發生小意外。
曾鈺成泊車時都已經好小心，期間亦不停望倒後鏡，但唔知係咪曾鈺成一味望右邊倒後鏡，顧到右嚟顧唔到左，一踩油下，車身竟然揩埋一邊，刮花咗左邊車身，呢個時候，仲喺車內駕駛嘅曾鈺成似乎毫無所覺，繼續倒車，最終搞到車身擦住欄杆而過。好彩一排鐵欄杆同牆身仲有少少距離，所以鐵欄杆幫佢卸一卸道力，如果唔係咁樣，車身倒後鏡分分鐘都會報銷。
落車之後，曾鈺成即刻趕住去錄影，都無睇架車有無整花。我哋尋日問佢架車到底有無損毀，曾鈺成就話好彩無事，架車亦神奇無乜刮花，所以唔需要維修，連噴油錢都慳番。「自駕魔咒」之下，政圈中人真係要小心喇。
