《明報》又出醜 老作稱第一

呢，尋日特區政府舉行十一升旗儀式及酒會，《明報》即時新聞網隆而重之跟進報道，其中提及稍後將喺會展舉行酒會時，唔知攞景定贈興，居然話「特首稍後將辭職」，引起一片嘩然。好多網民仲以為《明報》收到內幕消息，知道乜嘢「B計劃」、「C計劃」，所以提早預告特首辭職添，正如當年亞視誤報江澤民「死訊」咁。結果呢篇報道喺網上廣泛流傳近兩小時後，《明報》先至發出「更正及道歉啟事」，承認出現重大錯誤，特首唔係「將辭職」，而係「將致辭」喎，問你服未。

正所謂，差之毫釐，謬之千里。致辭同辭職雖然只係一字之別，但意思就差天共地，《明報》自吹「公信第一」，仲話係知識分子報紙，居然出現咁低級嘅錯誤，你話係咪好笑吖？不過咁，從另一個角度睇，今次烏龍事件都幾耐人尋味，目前香港政治氣氛詭異，陰謀論滿天飛，如果有人故意將馮京當馬涼，製造混亂，渾水摸魚，一啲都唔出奇o架。

講開《明報》嘅笑話，今次只係小兒科咋，呢份陰陽怪氣嘅報紙老作當食生菜，烏龍百出，幾乎日日更正，天天道歉，大家都見怪不怪咯。最經典係當年北京奧運閉幕禮，英國球星碧咸明明喺雙層巴士上一腳踢走個波，但《明報》即時新聞網居然話佢由巴士跳落來，一邊踢波一邊衝向人群喎。連舉世矚目嘅新聞都可以加油添醋亂咁作，咁嘅報紙居然仲好意思自吹公信力，究竟識唔識個「醜」字點寫？

咁都未算吖，《明報》除咗誠信破產，公信第一變老作第一，仲陰陽怪氣，經常自取其辱添。呢嗱，足總副主席貝鈞奇控告《明報》年前一篇社評誹謗，早前法庭裁定《明報》敗訴，須向原告賠償五十萬元兼繳付訟費，呢啲咪叫多行不義必自斃囉。

本來呢，《明報》要學阿Q自吹自擂，自我安慰，同其他人無關，問題係，家陣商品說明修訂條例已經生效，隨便自稱「乜乜第一」，隨時觸犯法例o架。名不正則言不順，究竟有冇人涉及誤導消費者，港府有必要認真查一查，依家連內地都全力打假喇，香港又點可以容許有人掛羊頭賣狗肉o架，叮！