城中鏡：花呔玩數理黑英醒神
有人話男士嘅領呔同女士嘅絲巾一樣，係服飾配搭中嘅靈魂，亦係優雅同品味所在。尋日喺十．一活動上見到瞓身環保嘅前天文台台長林超英（黑英）。黑英執到正出席活動，喺場中不時同環境局局長黃錦星密密傾，睇真啲，黑英條領呔好特別，印咗啲數學公式，由加減數至代數都有，曾經統領過天文台眾多科學主任，黑英嘅理科根底深厚，只係睇唔出原來佢咁鍾意數學喎！
林超英呢條數學主題呔好特別，原來係仔仔送贈。
黑英話，條呔係仔仔送嘅，佢覺得戴住呢條呔會精神啲喎，所以尋日專登揀呢條呔。近日政商界都有討論郊野公園起樓嘅聲音，黑英一早講明呢啲係「思想癌細胞」，咁佢尋日同黃錦星密斟，到底傾乜呢？佢解釋，自己支持保護郊野公園，尋日係同黃錦星講「支持你」，叫黃做好啲保護環境嘅政策。
