城中鏡：豪門家有囍事
入秋後，名人圈相繼有喜事傳出。港區全國人大代表王庭聰月尾嫁女，「玩具大王」蔡志明嘅仔仔蔡加讚同女友汪圓圓下月結婚，兩家人都為婚事而開心忙碌。尋日沙田馬場有賽事，竟然見到佢哋偷閒入場。
將披嫁衣嘅Crystal（右二），同姊妹團成員Ashley（右一）及Saltes（左一）入場玩。左二為Benny。
蔡加讚與汪圓圓將踏入人生新階段，姐夫馬鴻銘話會送金器賀舅仔成家立室。
馬鴻銘
王庭聰嘅囡囡王麗霞（Crystal）本月二十八日將喺印尼峇里島舉行夢幻婚禮，尋日Crystal同哥哥Benny及一班朋友入場捧爸爸名下愛駒場，雖然愛駒三甲不入，但準新娘Crystal同幾個姊妹一樣咁開心，問到Crystal待嫁心情緊唔緊張？佢笑笑口話，唔講都唔記得係今個月辦喜事添！或者因為尋日啱啱踏入十月，佢未能習慣婚期由下個月變咗今個月啩。哥哥Benny陪妹妹及朋友一齊入場，做股匯投資嘅佢對多變嘅金融市場好謹慎，佢話最近印度、印尼及巴西陸續加息，股民要小心泡沫爆破，因為香港難以獨善其身。
另一邊廂，蔡志明嘅大女婿馬鴻銘（John）亦單拖入場，蔡家將辦喜事，呢個姐夫有乜嘢準備呢﹖Karson乜都有，送咩禮物都令人幾頭痛，John原來已有打算：「送金啦！」婚禮最啱送金器，依家金價回落，仲好抵買添！
講番自己家中新成員，John透露細仔Kaden出世啱啱過咗百日，一對孖仔就兩歲幾，加埋已經五歲幾嘅大女，依家屋企四個小豆丁，經常都好熱鬧。
