政壇：搞搞政：盛品儒想返亞視做嘉賓
亞視前執董盛品儒（James）離開電視台後，日前風騷現身灣仔會展舉行嘅資訊科技界酒會，佢話老友知佢近排無業好得閒，爭住輪流約食飯，以前忙到無暇應約，依家得閒，可以同朋友歡聚時光喎！聲言會做亞視粉絲嘅佢仲話，出咗嚟都冇打算重返亞視，但如亞視邀請佢返去做節目嘉賓，都會諗吓喎，咁算唔算粉絲升呢做嘉賓呢？
設計圖片
James透露，嚟緊會放自己一個悠長假期去旅行，明年先重返工作崗位。做咩呢？佢賣關子話自己向來有投資物流及電子商貿生意，正構思進軍新媒體如遊戲平台，亦唔排除返內地發展，總之不愁無出路。
不過習慣忙碌生活嘅佢都未能校慢節奏，呢日見佢喺金鐘太古廣場的士站等車，雖然冇返工，但依然西裝骨骨，智能手機不離手。企咗十分鐘唔見車，佢開始有啲唔耐煩，跟住翹手張望，見到車嚟就急急上車而去。
