政壇：人力同戴耀廷劃清界線

泛民陣營又內訌！人民力量近五十名成員尋日到尖沙咀鐘樓附近，面向維多利亞港中環方向默哀一分鐘，以悼念去年發生嘅南丫海難，跟住又喺同一地點解釋佔中原因及向途人派發傳單。不過「慢必」陳志全及「快必」譚得志談及佔中時，卻同佔中發起人之一嘅港大法律系副教授戴耀廷劃清界線，更不時諷刺戴耀廷搞呢項運動嘅決心：「如果佔中唔阻人，不如去維多利亞公園」。慢必話，人力只接受「全民提名」及「公民聯署」嘅普選方案，故認為特首梁振英早前發表有關政改問題不應在《基本法》框架外嘅言論係挑釁。譚得志多次質疑戴耀廷佔中嘅決心，話戴耀廷表示要召集一萬名死士，結果只見十人，皆因戴耀廷並無做登記，快必仲話：「若相信戴耀廷，相信佔中嘅話，更加要加入佔中後援會。」人力本計劃活動進行兩小時，但期間遭約廿名手持五星旗及特區旗幟嘅網民踩場，雙方繼而對罵「奴隸」及「人渣」，雙方互罵約一小時，喺警方協商下散去。