政壇：發叔陳年黑白相曝光
有「新界王」稱號嘅鄉議局主席劉皇發，近日接受所屬政團專訪，文章尋日上載至網站，除咗講述發叔嘅發迹史外，仲附有幾張超經典兼有歷史價值嘅照片添！當年仲梳緊蛋撻頭嘅發叔正處奮鬥期，屬於「士前卒」時期，老照片包括發叔喺一九七○年出任屯門鄉事委員會主席後，同啲鄉紳及時任新界民政署署長黎敦義喺鄉委會門前齊齊合照，仲有一張相係發叔仲未做鄉議局主席前，企喺前主席陳日新身邊，接待時任港督麥理浩。
劉皇發（右二）當年未做新界王前，都要專心聽住時任鄉議局主席陳日新講嘢。左一為麥理浩。
呢篇專訪文章亦介紹發叔嘅成長歷程，包括二十四歲當選龍鼓灘村村長、十年後做咗當時最年輕嘅屯門鄉委會主席，之後做埋鄉議局主席，仲列出發叔嘅名句「拳頭不打笑臉人」，話佢拆彈嘅體驗在於「溝通」，怪唔得發叔平時見親記者都笑笑口啦！
至於發叔咁識拆彈，有咩方法化解現今社會嘅戾氣呢？發叔就話佢唔係特首，做咩問佢喎！嗱，大家學嘢喇，呢啲咪叫「事不關己，己不勞心」囉！
