政壇：貪曾去十．一活動冇人騷
東方報業集團早前獨家踢爆「貪曾」前特首曾蔭權爵士被廉政公署刑事調查連串貪腐醜聞，但佢都仲同一班「曾朋友」搭豪華郵輪豪遊地中海多國，而近日更被揭發在任時涉嫌為乞求同前教宗本篤十六世見面，透過公務員進行「魔鬼交易」。醜聞不絕下，貪曾尋日不顧臭名遠播而出席十．一活動，但厚顏現身卻冇咩人騷佢，佢惟有面懵懵強顏歡笑。
酒會現場冇咩人理貪曾，貪曾惟有面懵懵強顏歡笑，同太太兩個手指指、眼望望。
貪曾尋日同太太曾鮑笑薇出席灣仔金紫荊廣場舉行嘅十．一活動，到場時懶主動咁同啲舊下屬握手，但唔係個個都理佢。貪曾戴咗副變色鏡，喺戶外自動變成深色，結果佢成為全場唯一一個「戴黑超」嘅嘉賓，唔尊重兼礙眼，真係貫徹佢一向目中無人嘅性格。酒會開始時，一眾嘉賓喺台上互相祝酒，但「貪盡海陸空」嘅貪曾攞起杯香檳卻冇人即時同佢祝酒，佢強顏歡笑，好多嘉賓飲完飲剩先至同佢祝酒。直至貪曾落台時，由佢一手提攜嘅財政司司長曾俊華先同佢寒暄咗幾秒咁大把。
之後，貪曾喺會場內逗留咗一陣，依然冇咩人理佢，佢惟有自己飲吓嘢，同太太戙喺度眼望望、手指指咁。期間除咗「幫港出聲」召集人周融同佢傾咗兩句外，都冇咩人埋去同佢傾偈喇。貪曾跟住向外籍人士埋手，仲一度傾到七情上面，但個外籍人士就似乎有啲疑惑，淨係拎住張疑似貪曾卡片嘅卡紙仔頭耷耷。酒會之後，紅磡體育館仲有場文藝表演晚會，貪威識食又唔執輸嘅貪曾梗係唔會錯過免費文藝表演喇！只係一聽到落口供、「魔鬼交易」要求見前教宗等問題時就拒絕回應，入會場更係一支箭咁閃入去。
