政壇：小肥張難阻莫宜端跳船
政府熱廚房接連有問責第二梯隊嘅官員出逃，當中又以勞工及福利局前政治助理莫宜端（Zandra）辭官話題最多，事關以照顧兒子為名辭官嘅佢，呢頭離開政府，轉個頭已經出任兒童無限學校（九龍塘）助理總監（研究與發展），畀人質疑講大話之餘，更有人揣測佢只不過借照顧兒女為名跳船啫。點都好，Zandra嘅舊上司張建宗（小肥張）尋日出席個活動，就畀人問到下屬另謀高就一事，小肥張透露，佢曾經極力挽留莫宜端，甚至開出畀佢做兼職嘅條件，結果咪被請食檸檬囉，點都好，張建宗都話莫宜端家吓「一舉兩得」！
設計圖片
副局政助齊出缺
小肥張咁講唔係揶揄Zandra跳船成功兼飛甩佢，而係話Zandra可以返工又可以湊仔女。佢哋由上一屆政府拍檔到家吓，得力助手求去，小肥張點挽留呢？佢話知道Zandra辭職時，用咗好多唔同嘅方法去挽留佢，包括提議容許Zandra彈性返工，甚至可以喺屋企工作啦，嘩！真係遷就晒呢個下屬嘅需要，但結果都係徒勞無功，Zandra堅持要走。勞福局一直冇副局長，家吓連政治助理都出缺，難怪小肥張話，除咗要盡快物色副局長人選外，仲要努力搵番個政助。
雖然小肥張冇講有冇被騙，但佢喺政府有咁多規章制度嘅環境下，都願意提供咁多靈活嘅條件去挽留下屬，真係唔話得喇！而Zandra就口講照顧仔女，結果照顧埋學校，就引嚟唔少政圈中人議論。有人話，小肥張由頭到尾好似係個受害者，但政府弱勢，官員有責哦！
