未入正題前，太一叮先講個「逐臭之夫」嘅古仔。話說從前有個人體臭難當，人人避之則吉，點不知世界之大，無奇不有，偏偏有條茂利好中意、好享受呢種腐臭味，對佢貼身追隨，不離不棄。蔫豬頭都有盲鼻菩薩，問你服未。

嗱嗱嗱，唔好以為「逐臭之夫」只係古仔，其實現實世界大把呢種特別嗜好嘅異類，香港都有唔少。前特首曾蔭權爵士一身貪腐臭味，除咗貪威識食、大搞官商勾結被廉署調查，最近又被揭發為乞見教宗而同意大利政要進行魔鬼交易嘅醜聞，涉嫌干預司法，前朝三名司長紛紛捲入其中。有立法會議員講得啱，貪曾係為咗一己之私，不惜出賣香港法治司法獨立，考慮請出號稱「尚方寶劍」嘅權力及特權法調查事件，點知民建聯議員葉國謙唔支持不特止，仲幫貪曾幫到出晒面，你話佢係咪逐臭之夫吖。

葉國謙點樣護貪呢？佢話喎，唔可以單憑傳聞就決定引用特權法，又唔認為事件有問題喎。乜話？貪曾干預司法係「傳聞」？干預司法嘅做法「無問題」？全港傳媒雞乸咁大隻字報道呢單事件，全部基於意大利政要喺法庭上嘅供詞，有根有據，點會係傳聞吖。照葉國謙嘅邏輯，咁台灣第一貪官陳水扁鋃鐺入獄，權傾一時嘅貝魯斯干尼面臨審判，西南王薄熙來被判無期，都係傳聞係咪呀？叮！

貪曾干預司法引起全城憤怒，立法會有責任調查事件真相，葉國謙居然是非不分，以臭為香，以醜為美，公然為貪曾保駕護航，咁仲成世界？事實上，民建聯盲目護貪已經唔係第一次，舊年本報揭發貪曾「歎盡海陸空」連串醜聞，立法會打算對貪曾提出彈劾及不信任動議，亦係因為民建聯等保皇黨從中作梗，功敗垂成。立法會淪為「垃圾會」、「護貪會」，真係多得呢班民建聯議員唔少！

公然維護貪曾，即係與貪腐同臭，唔怪得民建聯有個綽號「禮義廉」啦，貪曾已經夠無恥，民建聯幫佢護航，咪即係無恥之尤，不如打正旗號改稱「保貪黨」吖，笨！最令人不可思議嘅係，中共第五代上台後厲行反貪，揚言「老虎蒼蠅一起打」，民建聯唔聽北大人支笛，反而汲汲於維護貪曾呢個英國爵士，相信好多市民同太一叮一樣思疑，佢地之間係咪都有魔鬼交易吖。

反貪潮流，浩浩蕩蕩；順之者昌，逆之者亡。貪曾呢個香港罪人固然法網難逃，醜態百出嘅保貪黨亦必遭市民唾棄，同貪曾雙雙被釘在歷史嘅恥辱柱上，叮！

第一手消息請下載on.cc東方互動iPhone/iPad/Android/Windows Phone Apps