城中鏡：珠姐拆穿樹根亂咁呻窮
香港島各界聯合會首席會長「珠姐」丁毓珠，前年開始不再出任東區區議員，結束近三十年區議員生涯。不過，佢自言作為「東區人」，雖然不在其位，但仍對地區事務好上心，日前出席活動就捉住「雙料議員」鍾樹根密密斟，現場所見佢哋由台下傾到上台，依然係雞啄唔斷，好似有講之不盡嘅話題咁，原來佢哋除咗傾到尚未拍板嘅東區地區重點工程一億元撥款外，仲傾到議員嘅薪酬問題。
鍾樹根（左）呻自己份區議員薪酬好低，隨即被丁毓珠拆穿。
樹根事後透露，原來佢趁機同珠姐「吐苦水」，笑言自己依家係最低人工嘅區議員之一，因為佢做咗立法會議員後，只可以攞到三分之二嘅區議員薪酬，點知被珠姐拆穿，即時話佢仲有份大啲嘅薪酬，樹根先笑笑口無再講落去。其實，樹根做咗「雙料議員」後，連埋立法會議員最大嗰份人工，合計每月薪酬有近十萬元，相比以前只係做東區區議會主席嘅月薪約四萬五千元，多咗一倍有多。珠姐辦學多年，數口一定好精，難怪樹根一講到錢，即被珠姐KO，樹根都係咪再無病呻吟喇。
