城中鏡：湯恩佳轟反孔廟係超「左」
早前孔教學院獲黃大仙區議會舉腳支持，喺鑽石山大磡村舊址興建本港首間孔廟，有望成為區內新地標之餘，更同區內現有嘅佛教志蓮淨苑同道教黃大仙祠，開創儒釋道三教同區鼎立嘅先河。不過，坊間有意見認為八千平方米咁大笪地，應該地盡其用起樓解決住屋問題好過，孔教學院院長湯恩佳對此就有啲牢騷。
湯恩佳（右）同女兒湯棋淯唱雙簧為興建孔廟護航。
孔廟模擬圖
湯恩佳日前以孔教代表身份，出席宗教界十一酒會時向我哋大吐苦水，話大磡村舊址笪地皮區區嗰八千平方米，唔算係好大，話同區嘅黃大仙祠仲大啦，又話香港咁多道觀、教堂，但偏偏一間孔廟都冇，喺香港起一間都唔係好過分啫，更直指反對建孔廟嘅人即係反對孔子，呢種想法「仲左過毛澤東呀！」
陪同佢一齊嚟嘅女兒、身兼學院永遠名譽會長嘅大律師Judy湯棋淯透露，因為工作關係不時要上兒童法庭，但慨嘆時下年輕人質素已經「不可同日而語」，好似佢見過有啲當事人開門唔係用手，而係用腳踢，坦言希望透過興建孔廟，向現代人宣揚孔夫子提倡嘅拚搏、和諧同互相尊重精神喎！
