城中鏡：黃永光自爆 好快又做爸爸
育有一個四歲囝囝嘅信和置業執行董事Daryl黃永光，好快又做爸爸喇，事關佢太太Charis再度有喜。Daryl前日出席活動時開心到震，口快快話太太已佗B四個月，但Charis馬上糾正，表示：「係五個月先至啱！」
身為男拔舊生嘅黃永光（右），帶埋太太Charis返母校捧場。
湯修齊（右）同兒子湯德安同台演出。
鄭泳舜（左）都拖住太太胡可兒睇舞台劇輕鬆吓。
梁錦松（後排左）同太太伏明霞（後排右）鼓勵三個仔女多學各項運動，訓練膽識。
仔定女先賣關子
Daryl前晚拖太太現身名校拔萃男書院，欣賞男拔家長同學生攜手為反欺凌而創作嘅舞台劇《勇之撼霸》。原來Daryl係男拔舊生，難怪咁捧場，唔知佢嘅四歲囝囝係咪都準備入讀男拔呢？佢笑笑口賣關子話：「總之好支持啦！」太太再度有喜，知道係仔定女未呢？佢就笑而不答，等大家估吓。
轉頭見到前財爺梁錦松一家，佢個大仔係男拔生，梗係一家大細去撐場啦。受太太伏明霞影響，阿松反對勤有功戲無益，放心畀子女玩各種運動，除咗溜冰、游水、單車、羽毛球，仲學埋滑水同跆拳道，唔通佢想培養子女做運動員？佢就話運動可以鍛煉勇氣同膽識，等仔女明白「敢贏」亦要「敢輸」嘅道理喎。
有份喺劇中飾演一名虐兒家長嘅博愛醫院前主席湯修齊，為咗健康着想，兩年內極速減咗四十磅，秘訣係每周跑步、游水再加健身操，飲食就多菜少肉，前晚同囝囝德安粉墨登場，果然冇晒肚腩。
