政壇：搞搞政：退休離任馮康傳執教鞭
醫院管理局新界東聯網總監馮康臨近退休，先爆出中文大學醫學院心臟內科教授余卓文封刀事件，搞到滿城風雨，原本唔想出嚟解畫嘅馮康，都忍唔住要喺大氣電波同余卓文隔空罵戰成個星期，疲態盡現。
設計圖片及對白
尋日，馮康喺退休前最後一次出席聯網工作計劃簡介會，期間先後多次被記者問到封刀事件嘅調查進度，又被問到事件會唔會令佢退休前留低一個污點，佢就笑住咁話：「暫時唔方便講，但事件唔會影響醫院嘅通波仔服務。」
今日起佢就開始退休前休假，有傳佢退休之後會過檔中大擔任公共衞生學院教授，甚至會做中大私家醫院院長，佢就陰陰嘴笑話，未確定嘅嘢唔講住，但佢一提起教書就好興奮話：「我依家都會去講書，你有冇興趣去聽一堂？」睇嚟佢退休後去執教鞭都係唔錯嘅選擇喎！
撇除搵緊工傳聞，其實佢嘅計劃都有好多，首先想放大假旅行同休息，期間仲要開始練跑備戰明年初舉行嘅馬拉松賽事，當然唔少得拉佢最愛嘅二胡啦！為咗送別馮康，醫院公關同記者就向佢送上一幅「Q版馮康」拉二胡嘅漫畫，令近月愁眉不展嘅馮康終於笑番晒，仲話可以將呢個「Q版馮康」擺上社交網站做Profile picture（個人照片）添！
