西貢區議會早前罕有地泛民主派同建制派聯成一線，二十三名區議員齊齊聯署動議譴責議員「哪吒」方國珊，話佢未經批准下非法籌款，區議會聽日就會召開特別大會討論有關動議。點知戰鬥力頑強嘅哪吒批評聯署嘅人「未審先判」，矛頭仲直指有份聯署嘅新民主同盟范國威，因為范國威今年七．一都涉嫌非法籌款，各位區議員應該同樣譴責，否則係對人不對事。

方國珊

范國威

眾所周知，哪吒喺區議會不受泛民同建制歡迎，但唔代表佢會坐以待斃，佢尋日特登發表聲明回應被譴責一事，佢話警方作為執法機關，自然會對不法行為進行調查，但多位區議員竟然借區議會之名，向佢進行公審，根本係政治打壓，對佢實在好唔公道。

哪吒反駁話，如果法庭未有任何判決，多位區議員已動議譴責佢非法籌款，咁范國威七．一公然非法籌款十一萬元，更應該被譴責，而且范國威曾向傳媒承認有籌款，希望西貢區議會周三開會時，一併討論譴責范國威，強調參與譴責嘅區議員「正人必先正己」喎！

第一手消息請下載on.cc東方互動iPhone/iPad/Android/Windows Phone Apps