政壇：林健鋒「怕黑」樂做乘客
行政會議成員兼立法會議員Jeffrey林健鋒，早前因趕住去舊啟德機場跑道參加七．一巨蛋音樂節，因而唔小心逆線行駛，結果被控不小心駕駛，裁判官仲話可能改控更嚴重嘅罪名。今日係十月一日，好多活動典禮都有請Jeffrey出席，但佢見過鬼都怕黑，聲言短期內都唔會揸車，乖乖哋做乘客就算數喇！
林健鋒（左三）被控不小心駕駛後首次現身，聲言今日只做乘客去參加十．一活動。
Jeffrey話，由於佢單案涉及司法程序，所以現階段唔方便評論太多，但佢話平時出入都有司機車佢，只係咁啱事發當日司機放假，佢先至自己揸車，點知就出咗事。至於今日舉行嘅各場十．一活動，佢話一定會現身，但只會做乘客坐車去參加。
講開又講，尋日佢所屬嘅政團正式踩入新界西，喺荃灣成立新界西地區支部，仲請到政務司司長林鄭月娥出席。不過，當佢嘅黨友梁君彥話目前已有二十二位區議員加入時，在旁嘅林鄭即時打個突，話根據手頭上資料，明明得十六位區議員咋喎。好彩林鄭識打圓場，話估唔到咁短時間就有咁多區議員，唔知下次會有幾多人呢？
