政壇：騰訊深圳總壇過癮好玩
騰訊嘅深圳總部大樓，外貌平平無奇，未必感受到公司嘅創意，原來大樓裏面，暗藏唔少「好玩」元素，騰訊管理團隊更有唔少電玩高手。
「欄王」劉翔出席騰訊活動嘅照片，出現喺員工咖啡室。
咖啡室入面有「QQ企鵝」出售。
騰訊深圳總部其中一個玩味元素，係員工咖啡室，除咗展示咗騰訊開發嘅產品與應用外，相片牆展示騰訊嘅員工與社區活動，就好似平時較少拍照嘅主席馬化騰，都「唔覺意」展示「欄王」劉翔出席騰訊活動嘅照片，外人睇到真係好玩又得意。咖啡室入面亦開設一個以「騰訊招牌——QQ企鵝」為主題嘅紀念同特許產品售賣點。對於喜愛QQ企鵝嘅粉絲嚟講，肯定會覺得非常開心。
最好玩嘅，莫過於馬化騰同總裁劉熾平嘅公餘興趣，原來兩位大人物，不單止精於開發遊戲，就連玩GAME都有一手。馬化騰自爆，近日最愛玩嘅是微信新推出嘅「節奏大師」，而劉熾平玩得最精嘅，係「打飛機」同「天天愛消除」這兩款熱門遊戲。馬化騰又話自己工作繁忙，但係公餘時間有時都會留喺公司與同事大玩On Line Game，「Red Alert」、「DOME」、「Delta Force」呢啲經典遊戲更加係佢嘅最愛。愛玩這類Game嘅遊戲迷，真係有可能曾經同馬化騰線上對戰都唔出奇。
